දේශබන්දු තෙන්නකෝන් පත්කළ ආකාරය ගැන “නීතිඥ සාමූහිකය” ප්‍රශ්න කරයි

  • By editor
  • December 18, 2023
  • 0
  • 159 Views

වැඩබලන පොලිස්පති දේශබන්දු තෙන්නකෝන්ට එරෙහිව නඩු ගණනාවක් විභාග වෙමින් තිබියදී ඔහුව එම තනතුරට පත්කිරීම සම්බන්ධයෙන් ශ්‍රී ලංකාවේ ප්‍රමුඛ පෙළේ නීති උපදේශක කණ්ඩායමක් වන ‘නීතිඥ සාමූහිකය’ කණගාටුව පළකර තිබේ.

හිටපු හමුදා සෙබළෙකුට වධහිංසා පැමිණවීම සම්බන්ධයෙන් ශ්‍රේෂ්ඨාධිකරණයේ නඩුවක් විභාග වෙමින් තිබියදී වැඩබලන පොලිස්පතිවරයා ලෙස දේශබන්දු තෙන්නකෝන් පත් කිරීමට ආණ්ඩුක්‍රම ව්‍යවස්ථා සභාව අනුමැතිය ලබාදුන්නේ කෙසේදැයි ශ්‍රී ලංකා නීතීඥ සංගමයේ හිටපු සභාපතිවරයාද වන ජනාධිපති නීතිඥ උපුල් ජයසූරිය ප්‍රශ්න කරයි.

පසුගියදා එම සංවිධානය පවත්වන ලද ජනමාධ්‍ය සාකච්ඡාවකදී උපුල් ජයසූරිය මෙම අදහස් පළකර ඇත.

වැඩබලන පොලිස්පති තෙන්නකෝන් එම තනතුරට පත්කිරීමේදී ඔහුට නඩු කිහිපයක් තිබූ බවත්, ඔහුට තවදුරටත් මහජන විශ්වාසයක් නොමැති බවත්, පසුගියදා ශ්‍රේෂ්ඨාධිකරණය ලබාදුන් තීන්දුව සම්බන්ධයෙන් අදහස් දක්වමින් උපුල් ජයසූරිය ප්‍රකාශ කළේය.

දේශබන්දු තෙන්නකෝන් ඇතුළු පිරිස වසර ගණනාවකට පෙර පුද්ගලයෙකුට වධහිංසා පැමිණවීමේ චෝදනාවට වරදකරුවන් වූ බැවින්, ඔවුන්ට එරෙහිව වධහිංසා පනත යටතේ චෝදනා ගොනුකිරීම නීතිපතිවරයාගේ වගකීම බවද ඔහු අවධාරණය කළේය.

මෙම වැඩබලන පොලිස්පතිවරයා ජනාධිපතිවරයා විසින් පත්කර ආණ්ඩුක්‍රම ව්‍යවස්ථා සභාව අනුමත කළේ කුමන තත්ත්වයක් යටතේද යන්න එහිදී මහාචාර්ය සාවිත්‍රි ගුණසේකර ප්‍රශ්න කළාය.

Leave a Reply

Your email address will not be published. Required fields are marked *