යාපනය දැරියගේ අත කපා ඉවත් කිරීමේ සිද්ධියට අදාළ හෙදියගේ විදෙස් ගමන් තහනම්

යාපනය ශික්ෂණ රෝහලට උණ රෝගයට ප්‍රතිකාර ලබා ගැනීමට ඇතුළත් වූ අට හැවිරිදි පාසල් ශිෂ්‍යාවකගේ අතක් කපා ඉවත් කිරීමේ සිද්ධියට අදාළව එම වාට්ටුව භාර හෙදියගේ විදෙස් ගමන් තහනම් කිරීමට යාපනය මහේස්ත්‍රාත්වරයා නියෝග කළේය.

අදාළ දැරියගේ පියා ඇතුළු පිරිසක් එම හෙදියට එරෙහිව යාපනය අධිකරණය වෙත ගොනු කරන ලද නඩුවක් සලකා බැලීමෙන් අනතුරුව මෙම නියෝගය නිකුත් කර ඇත.

එම රෝහලේ ළමා වාට්ටුවේ හෙදියක වන ජනනි රමේෂ් නමැත්තිය මේ සම්බන්ධයෙන් චෝදනා ලැබ සිටින අතර, ඇයගේ නොසැලකිල්ල හා වැරදි ලෙස එන්නතක් ලබා දීම හේතුවෙන් දැරියගේ අත කපා ඉවත් කිරීමට සිදු වූ බව මූලික පරීක්ෂණවලදී හෙළි වී තිබේ.